Book,
Buch der Chroniken und geschichten mit figure und pildnüssen von anbegin der welt bis auf diese unsere Zeit
Antonius Koberger, Nuremberge, German edition, (1493)
Abstract
Blat IIr
...
Moyses der gottlich prophet vnd geschicht beschreiber der schier, viiC, iar vor dem Troyanischen krieg gewesen ist leret wie got der macher vnd ordner der dinge als er diss werck fürname zu allererst den himel zeseyn einen stul desselben gottes des schöpffers gemacht vnd in die höhe auffgehenkt vnd dar nach die erden gestifftet vnd den himel vnderworffen hat. Aber die finsternüssen hat er gesetzt in der erden dann sie begreüft durch sich selbs nichtzit des liechts sie nemme es dann von himel. In dez hat er gesetzt das ewig liecht vnd die obern gaist und das ewig leben, vnd hinwiderümb in der erden die finsternüs vnd die vndern gaist und den tod.
...
Er hat in anfang die engel, aller creatur die ersten gemacht vnd auß den das nicht ist, dann er ist durch die ewigkeit starck, vnd durch die stercke vnermeßner machtigkeit, die des ends vnd der maß mangelt, als das leben des Schöpffers. Darümb was wunders ist das, ob der, der die werlt machen wolt vorhin ein materi daraus er machet, fürberaittet auß dem das nit was, das haben villeicht auch die Saraceni verstanden, die sprechen das die engel von got aus den finsternussen zum liecht gefürt vnd mit ewiger frewd erfült seinen doch ist in etlichen die einpildung göttliches stammens nit bliben, sunder sie sind aus aigner verkerung vom gütten zum ubel getretten vnd zu teüfeln worden. Die erde was eytel, das ist (als Ieronimus oder die, lxx, ausleger) vnsyhtperlich und vnzesamen gefügt, die er von irer zestrewlichkeit wegen einen abgrund nennet, vnd die die kriechischen chaos haissen einen abgrund, heist er die erden, das ist ein materi mit driueltiger ermessung in die allerhohsten tieff ausgepraittet. Da von auch Ouidius der poet in seinem gedicht gar schön meldung thüt, vnd der gaist des herren ein werckzewg gotlicher kunst swebet ob den wassern: als der wil eins pawherren so er yde ding zemachen verordent, so die werck gottes volkommen sind, so wirdt die beschöpffung der ding außgedrückt in sechser zall, des teill sind, ains zway drey.
...
